轉載：淫照感想(II)

轉載：淫照感想(II)

之前我POST過對今次事件的感想，有人同意，有人話我假正義，懶多道理。我唔想爭論，我只係講出我自己睇法。

我之前講過：男歡女愛，大家中意起上黎，拍拖，上床，攪野係好正常事。而拍照同拍片，我相信呢個世界都唔止陳生一個，娛樂圈人都唔止。如果要搵，只要上XTUBE，YOUTUBE之類，大把人將自己做愛，打飛機片段供人欣賞。我奇怪點解果D片個個要睇，又唔投訴？仲話正添！我知問題就係因為而家果個係陳冠希，佢係名人，藝人，一個臭串而唔得歡心嘅人，佢一有行差踏錯d人就不留餘地去踩佢。

大家成日話自己思想開放，可以接受事物，外國真係好多名人藝人拍過四仔，又拍過成人雜誌封面，人地一樣做到天皇巨星，人地一樣係咁做人。點解外國嘅野，大家接受到而自己香港野接受唔到呢？

我再強調，我唔係要撐陳生同班女星，我都講過佢地呢班新藝人，真係玩得好顛，乜都做得出，我更相信有拍同人上床片同相，唔止陳生，好多藝人同有錢人都中意玩呢家野，如果唔係都唔會有yoyo換衫，俾所謂男友影左流左出去，鬧上法庭。所以，今次真係唔止有關藝人而家人心惶惶，而係成個娛圈都人心惶惶。怕下一個唔知輪到邊個！而且好明顯，相中有人係拍左丸，所以態度更加狂野(可能跟本當中唔止陳生一個男性)。

今次件事，我個人覺得係一件不幸事，只怪陳冠希唔好彩，如果事情真係如報導話佢拎電腦去整而闖禍，佢就真係蠢左！因為有常識的人都會先將自己私人野backup然後deleted晒佢先會拎去俾人整，或者搵親信，自己人上門整，我估唔到佢會就咁拎去俾人整。所以陳生的確係要負上責任。但係陳生嘅蠢同疏忽，究竟要負上到咩野程度的責任先令人滿意呢？係唔係真係要佢身敗名裂，冇得嚮娛樂圈做，甚至可能攪到佢顛，或者死，先至係負上責任呢？！有人話要捉佢去差館，拉佢，佢係禍首等等言論。其實講真，先當陳生係一個普通市民黎講，佢並冇犯法，佢拍果d片同相，本身係作私人欣賞同用途，而那些女人，亦冇全何跡象佢地係被迫，而家反而係佢d私癮俾人盜竊左，發放左出去，其實佢係受害者，佢真係有權報警！大家都試過有時send相俾人去交友，人地偷左你地張相，話係自己，到處呃人，大家都好嬲，好唔開心，亦都怕會俾一d人知道啦！所以，陳生今次的確會係好困擾！加上佢係名人，一個一直都唔得人心嘅名人，自然佢有咩野事，就更多人落井下石。

我知大家都係嬲好多人講大話，扮野，好假！娛樂圈根本就係假！佢地只係要娛樂大家！栢芝未出道之前，已經係wet 妹，玩到顛架啦！係d觀眾話佢靚，話佢夠真，係咁捧佢，跟本觀眾都盲目架啦！twin 跟本到而家都唔識唱歌做戲，但一樣紅足咁耐，又係班盲目觀眾支持！

我都認為，「自己做過嘅野自己要負責」，所以，陳生或者任何做任何野之前都要考慮後果。我今次並唔係想嚮呢件事上下定論，我只係想同大家講，唔好再唔理性去討論呢件事，唔好以為講得多，當事人就會衰硬，相反，可能幫佢地會越稷越紅。就好似當年巴士阿叔，佢行為跟本就係有問題，但係就係有人講，傳媒又老吹，結果攪到負面變正面，紅左個阿叔。而家呢件事，已經俾某d傳媒嘅度吹噓，誇大件事，作得又作！日日將呢個報導放在頭版！而且我地亦隨時可能被利用作政治上的棋子，遲d事件愈整愈大，中國政府可以大條道理隨時嚴制網上言論及發放自由，到時大家喊都冇謂。大家有時間不如關心下中國雪災仲好啦！

最後，祝大家新年快樂！

來源：某個討論區
作者：電影工作者
日期：二月六日